رواية حكايتي الرائعة

اخدوا الشرطه عزيز وطلبوا ان عليا لازم تروح معاهم القسم هي كمان..

داخل قسم الشرطه قعدت عليا قدام الظابط وهي عماله تبكي وحكتله ان عزيز صاحب المحل الا هي بتشتغل فيه وانها رجعت البيت لقته ومتعرفش دخل البيت ازاي..سألها الظابط ان ممكن عزيز يكون كان معاه نسخه من مفتاح الشقه يكون سرقها منها مثلا وهي بتشتغل ومش واخده بالها وسألها لو هو فعلا كان متعود يروحلها زي ما قال.. ردت عليا بصدق وقالت انه عمره ما زارها في البيت ابدا وان عمره ما دخل شقتهم دي غير يوم عزا باباها لما جه مع زملائها في المحل عشان يعزوها واكدت ان الشقه مكنش ليها مفتاح غير معاها ومع والدها الله يرحمه ومفيش نسخه تانيه من المفتاح.. رد الظابط ببساطه وقالها ممكن يكون اخد المفتاح بتاعك في اي وقت وعمل عليه نسخه وانتي متعرفيش.. اندهشت عليا وقالت ان عزيز كان دايما محترم معاها جدا وانها بتشتغل معاه بقالها اكتر من 3 سنين وان عمره ما عمل اي حاجه تدل انه انسان مش كويس وانها مستغربه انه يحاول يتهجم عليها بالشكل دا.. ابتسم الظابط واكدلها ان من الواضح ان عزيز شارب حاجه لانهم لما قبضوا عليه كان مش في وعيه..

 وسألها الظابط عن اي حد من اهلها عشان يجي ياخدها من القسم  ..فكرت عليا بحزن وقالتله انها ملهاش حد...رد الظابط بحزن وقالها يبقى للأسف هتباتي هنا النهارده لحد ما تتعرضوا علي النيابه بكره الصبح..اتفزعت عليا من فكرت انها تبات في القسم وفكرة بسرعه في اي حد وملقتش طبعا غير "زين" واتكلمت بتوتر وقالت للظابط: ممكن حضرتك تكلم جوزي يجي ياخدني

اتص0دم الظابط وسألها: هو انتي متجوزه ؟ !!

هزت عليا راسها ب ااه

اتصدم الظابط وقالها: طب ماقولتيش كدا من الصبح ليه وفين جوزك دا واسمه ايه

عليا بتوتر: اسمه زين الشافعي

الظابط بهدوء: بيشتغل ايه وفين ؟

عليا: صاحب شركات الشافعي بتاع الحديد والصلب

فتح الظابط عينه بصدم#مه وسألها بتأكيد: انتي متأكده

هزت عليا راسها باااه

الظابط بعدم تصديق: انتي متأكده ان انتي زوجة زين الشافعي صاحب شركات الشافعي للحديد والصلب..دا ابن اكبر عيله في البلد

عليا بهدوء: لو سمحت كلمه وعرفه ان انا موجوده هنا

الظابط بزهول: تمام

ووقف الظابط عشان يبعت حد ل زين الشافعي يبلغه ان زوجته في القسم

وفضلت عليا في مكتب الظابط وهي بتبكي ومش مصدقه الا حصلها دا وان الدنيا مبقاش فيها امان للدرجادي وان واحد زي عزيز للأسف كانت فكراه راجل محترم واتصدمت لما لقته بيتهجم عليها وعايز يعمل فيها كدا وكمان يسوء سمعتها بالطريقه دي..رواية زوجة ابن الأصول بقلمي ملك إبراهيم